چاودێری‌ كوردۆساید ئیدانه‌ی‌ هه‌وڵی‌ رفاندنی‌ یه‌كێك له‌ئه‌ندامه‌كانی‌ ده‌كات

دةرياى/نوور
رێكخراوی‌ كوردۆساید/چاك به‌ توندی‌ ئیدانه‌ی‌ هه‌وڵی‌ رفاندنی‌ یه‌كێك له‌ ئه‌ندامه‌كانی‌ ده‌كات.
جێی‌ ئاماژه‌یه‌ ئێواره‌ی‌‌ سێشه‌ممه‌ له‌ شارۆچكه‌ی‌ كفری‌ 3 كه‌س به‌ ئوتومبیلێكه‌وه‌ هێرشیان كرده‌ سه‌ر سه‌باح عه‌لی‌ قاره‌مان به‌مه‌به‌ستی‌ رفاندنی‌، به‌ڵام سه‌ركه‌وتو نه‌بون له‌و هه‌وڵه‌ و به‌وته‌ی‌ سه‌باح عه‌لی‌ قاره‌مانیش یه‌كێك له‌و سێ كه‌سه‌ به‌رپرسێكی‌ خانه‌نشینكراوی‌ یه‌كێتی بوه‌.
له‌ به‌یاننامه‌یه‌كيدا‌ رایده‌گه‌یه‌نێت: ئه‌و هه‌وڵه‌ نه‌زۆكه‌ی‌ رۆژی‌ سێشه‌ممه‌ رێكه‌وتی‌ 19/1/2010 بۆ رفاندن و ترساندنی‌ ئه‌ندامی‌ ده‌سته‌ی‌ كارگێڕی‌ رێكخراوه‌كه‌مان سه‌باح عه‌لی‌ قاره‌مان جگه‌ له‌ ئیفلاس بون و ته‌سلیم بون به‌ ئیراده‌ی‌ وشه‌ی‌ ئازاد و بیروڕای‌ جیاواز، شتگه‌لێكی‌ تر نییه‌ و له‌پشتی‌ ئه‌و هه‌وڵه‌ نه‌زۆكه‌وه‌ ده‌یان پیلانی‌ تر هه‌یه‌ بۆ به‌رته‌سككردنه‌وه‌ی‌ مه‌وداكانی‌ ئازادی‌ بیروڕا و رواندنی‌ تۆوی‌ رق و دروستكردنه‌وه‌ی‌ لیژنه‌كانی‌ ئیغتیالات و دوباره‌ پشێوی‌ دروستكردن له‌سه‌رجه‌م ناوچه‌ جیاوازه‌كانی‌ كوردستاندا.
ئێمه‌ له‌رێكخراوی‌ چاودێری‌ كورۆدساید/چاك، هه‌مو هه‌وڵێكی‌ هاوشێوه‌ی‌ ئه‌و جۆره‌ كاردانةوانه‌ له‌ ئاست بۆچۆنێكی‌ جیاوازدا شه‌رمه‌زار ده‌كه‌ین و داوا له‌حكومه‌تی‌ هه‌رێمی‌ كوردستان ده‌كه‌ین كه‌ بۆیه‌ك جار له‌دوای‌ 19 ساڵ له‌ قودره‌ت و ئیراده‌ی‌ حیزب گه‌وره‌تر بێتو وه‌ك ئه‌وه‌ی‌ له‌ئاست لێپرسینه‌وه‌ی‌ كادیر و ئه‌ندامانی‌ لیژنه‌كانی‌ رفاندن و تۆقاندنی‌ حیزبدا نییه‌، ئاواش چیدی‌ رێگه‌ نه‌دات له‌وه‌ زیاتر یاری‌ به‌چاره‌نوسی‌ رۆڵه‌كانی‌ ئه‌م میلـله‌ته‌وه‌ بكرێت و به‌ رۆژی‌ روناك له‌ناوجه‌رگه‌ی‌ شارێكی‌ ئه‌نفالكراودا هه‌وڵی‌ كوشتن و رفاندنی‌ رۆڵه‌ و پاشماوه‌یه‌كی‌ ئه‌نفال بدرێت.